Planzer isch 1936 vo öism Grossvatter Max Planzer gründet worde und siit 1966 en Akziägsellschaft i Familiähand. Als Familiänundernäme stönd für öis Mänsche im Mittelpunkt, wills ooni diä nöd gaat. Drum pflägemer e uusprägt familiääri Firmekultuur. Dadezue ghööred Aaschtand, Reschpäkt, Fliiss und e ghöörigi Porzioon Spass. Es Generazioonehuus wi mir dänkt i mee als äinere Generazioon. Naachhaltigs Handle isch öis wichtiger als churzfrischtigs Gwünnschtrebe. Die langi Sicht kombiniäremer mit em gsunde Mänscheverschtand. S’Resultaat: Schwiizer Kwalitäät und en Partner, wo Si no lang begläitet. Da erfaared Si mee über öisi Gschicht.

Was Si über öis sötted wüsse

A 62 Standort i de Schwiiz und a 10 im Usland, zum Bischpiil z Itaalie, Düütschland, Frankriich und Hongkong, beschäftigemer über 6'530 Mitarbäitendi. Drunder über 400 jungi Erwachseni, wo bi öis iri Bruefsleer mached.

Öisne Bisness-tu-Bisness-Chunde büütemer erschtklassigi Transport- und Laagerlogischtikdienschtläischtige und e Vilfalt a chundenorientiärte Gsamtlöösige– under anderem als 4PL-Aabüüter im Beräich Suppläi Tschein Mänäntschment. Bi Dienschtläischtige mit Privaatempfänger (Bisness-tu-Konsuumer) trägemer s’elegante Gründerlogo, zum Bischpiil bi Planzer Paket, Planzer Homeservice oder bi Farmatranspört nach GDP-Läitlinie.

Mit regionaal verankerete Gsellschafte und mit eme dichte Partnernetzwerch simer wiit über öisi Landesgränze uus täätig. Dadebii wicklemer siit Jaare 60% vo de Transpört uf de emissioonsarme Schine und 40% übers Straassenetz ab. Im Beräich Laagerlogischtik hämmer 2018 gägenüber em Voorjaar 20,6% CO2-Emissioone pro verarbäitets Kilo iigschpaart – es hööchscht erfröilichs Resultaat, wi mer mäined. Da erfaared Si mee übers Theema Naachhaltigkäit.

Gläbti Wert

Liideschaftlich

Mir halted öisi Familiä- und Firmewert hööch, will si öis starch mached. Mir bündled öisi Chreft zugunschte vo de Cherndienschtläischtige Transport, Laagerlogischtik und Speziaallöösige; und zum Vortäil vonere maximaale Arbetskwalitäät. Dadefür gämmer Tag für Tag öises Beschte und bhalted immer s’gmeinsame Ziil vor Auge.

Familiäär

Mänsche gänd öisem Undernäme es Gsicht und öisne Wert e Schtimm. So beschäftiget d’Planzer-Gruppe über 5900 Fachpersoone, devoo mee als 350 Lernendi.

Naachhaltig

E Familiä wie öisi dänkt a d’Naachwält. De Mitmänsche, Umwält, Werchzüüg und Rössursse hebed mer Sorg. Und vor alem de Zuekunft. Und mir kümmered öis um en traagfääige Bruefsschtand und en guet uusbildete Naachwuchs.

Beweglich

Es liit i de Natuur vo öisem Metiee, dass mir i Bewegig bliibed. Das gilt für öises Dänke in Löösige genauso wie für öisi Prozäss. Nöd immer entschäidemer öis für de diräkti, sonder hüüfig für de gschiidschti und immer für de effiziäntischti Wääg.

Persöönlich

Mit Muet für Nöis und Sinn für Machbars isch öis chuum e Perschpektiive z’gwaagt. Dadebii achtemer uf e umfassendi Sicherhäit für Mänsche und Waare. Obwool mir digitalisiärt sind, zeled bi öis immer no de Handschlaag und s’persöönlich Gschpröch.

Planzer in Zaale

1936

Gründig Äinzelfirma

1966

Akziägsellschaft in Familiähand

Modal Split

60% Schinä, 40% Strass

72

Standort, devoo 10 im Usland

240

Baanwage jedi Nacht

2'120

Faarzüg, devo 350 Subundernämer

1'275'000 m2

Laagerflächi

11

Hochregallaager für 176'600 Palett

Mitarbäitendi

6'530

Mänsche

400

Lernendi

82

Nazioone

22%

über 50-Jäärigi

Das isch öisi Gschäftsläitig

Nils Planzer

CEO & VRP

De Nils (1971) schtartet als LKW-Mechaaniker und bildet sich i verschidene Beräich wiiter. 1997 stiigt er is Familiänundernäme ii. Sächs Jaar spööter übergit em sin Vatter Bruno s’Schtüür als CEO. Siit 2007 presidiärt er de Verwaltigsraat vo Planzer. De Nils hät gern diräkti Wääg, muetigi Entschäidige, erfrischendi Begägnige, Mänsche mit Fröid am Schaffe, Sport, feins Ässe, d’Berge und s’Meer.

Severin Baer

VR, Läiter Nazionaali Transpört, Läiter «Planzer Paket»

De Severin (1985) isch glernte LKW-Mechaaniker und eignet sich wiiteri Brüef aa, zum Bischpiil de Technisch Chaufmaa. 2005 läit er im Familiänundernäme loos. Er sitzt i de Gschäftsläitig, im Akzionariaat und im Verwaltigsraat vo Planzer. De Severin verantwortet s’nazionaale Transportbisness. Er setzt uf Passioon, Fliiss und Eerlichkäit. Graadlinigi Mänsche schetzt er bsunders. Privaat verbringt de Severin gern Ziit mit sinere Familiä oder uf Schii ituure.

Marius Buhl

CFO

De Marius (1973) macht d’Matuur und es Betriibswirtschaftsschtudium. Siit 2019 ghört er zur Planzer-Gschäftsläitig und zäichnet für Finanze und Kontrolling verantwortlich. Im sind Transparänz, Verlässlichkäit, Flexibilitäät, offni Komunikazioon und Zuelose wichtig. Und es gsunds Pflichtbewusstsii. Sini privaate Stunde teilt de Marius mit Familiä, Jangtäimers, Technik und Musig.

Sandro Knecht

Läiter Internazionaali Transpört

De Sandro (1966) isch glernte Schpedizioonskaufmaa. Als Füerigschraft i globaale Logischtikundernäme sammlet er vili Jaar Erfaarig, under anderem i de USA, Irland und Groossbritannie. En Maaster i Betriibsökonomii rundet sin bruefliche Werdegang ab. Em Sandro sind innovatiivs Dänke, Tiimgäischt und es fortschrittlichs Umfäld wichtig. Sis Motto: Vo Fäler lerne und Erfolg fiire. De Herzbluet-Zürcher hät e Voorliebi für Wältgeschee, Räise, fäins Ässe, guete Wii und eerlichi Mänsche.

Patrik Meier

Läiter Laagerlogischtik

De Patrik (1973) macht e käufmännischi Leer, dänn es hööchers Wirtschaftsdiploom und nimmt aktuell am Ädväänsst Mänätschment Programm täil. 1999 läit er bi Planzer loos und übernimmt im Juli 2021 de Schtaab als Läiter Logischtik und Mitgliid vo de Gschäftsläitig. Bsunders am Herz ligged em Aaschtand, Reschpäkt, Fäärness und Eerlichkäit. Sini Batterie ladt de Patrik bim Tschogge, Schiifaare, Räise und mit sinere Familiä uuf.

Hansjörg Rupp

Läiter Staab

De Hansjörg (1975) lernt Automechaaniker und wird dänn Automobiilchaufmaa. 2006 fangt er als Filiaalläiter im Planzer-Garaaschebetriib Challnach aa. Hüt füert er d’Technik und isch under anderem für de Iichauf vo Rollmateriaal zueschtändig. Im isch es wichtig, eerlich, loiaal, fliissig und sich sälber z’sii. Er schetzt es gsunds Sälbschtbewusstsii, soziaali Kompetänz, Vertroue, Abwächslig und sis tolle Tiim. Sini Batterie ladt er i de Berge, bim Velofaare, Tschogge oder Langlaufe uuf.

Hansruedi Vogel

Läiter Support, IT

De Hansruedi (1980) schtartet als Elektromontöör und bildet sich i verschidene Beräich wiiter, am Schluss zum Maaster i Prozäss- und Logischtik-Mänätschment. 2006 wächslet er zu Planzer. Siit 2021 läitet er de Support. De Hansruedi isch offe für Nöis. Eerlichkäit und Pünktlichkäit setzt er für en erfolgriichi Zämearbet voruus. Sini freie Stunde verbringt er am liebschte mit Bäike, uf em Fuessballplatz, bim Pokere oder als Hobichoch.

Heinz Wiedemeier

Läiter Planzer Houmserviss, Verkauf & Kundeentwicklig, Zentraale für Chundeaaliege

De Heinz (1966) lernt Buntmetall-Schlosser, absolviärt e Handelsschuel, wird Marketingplaaner und dänn erfolgriiche Undernämer. 2014 schtiigt er bi Planzer ii. Er isch Mitgliid vo de Gschäftsläitig und verantwortlich fürs B2C-Gschäft. De Heinz isch überzügt, dass mer mues Fääler mache zum wiiterchoo. Er liebt Eerlichkäit und Authentizität, knackigi Schii ipischte und gnussvolli Ööbig mit Fründe.

Si ghööred zu öisere erwiitertä Gschäftsläitig

Philipp Bättig

Läiter Immobiiliä Düütschschwiiz

De Philipp (1973) lernt Tüüfbouzäichner und schlüüsst es paar Jaar spööter als Bouinscheniöör ab. 2005 schtartet er bi Planzer. Hüt läitet er gmeinsam mit em Lukas Ricklin de Beräich Immobiiliä und schtaat de Düütschschwiiz vor. Dänn isch er auno Mitgliid vo de Aalaagekommission vo de Planzer-Personaalvoorsorgeschtiftig. De begäischtereti Tschogger und Kunschtliäbhaber läit Wert uf sälbschtändigs und sachbezoges Schaffe und schetzt s’familiääre Umfäld vo Planzer.

Andrea Brosi

Läiter Personaal

De Andrea (1983) hät Juura studiärt und chunnt im 2015 zu Planzer und wird 2019 Läiter Personaal. Zäme mit tiimfääige, loiaale, fääre Koleegine und Koleege will er Ziil erräiche und öppis bewürke. De Andrea hät gern churzi, persöönlichi Komunikazioon swääg und es gsunds Arbetskliima. Privaat isch er bim Winterschport, Bergschtiige, Golfe und Jage aazträffe.

Jan Pfenninger

Läiter Marketing & Kommunikatzioon, Gaschtronomii

De Jan (1987) absolviärt e kaufmännischi Leer und spööter en Bätscheler i Betriibsökonomii. Bi Planzer isch er siit 2002. 2015 übernimmt er d’Läitig vo Marketing & Komunikazioon und sitzt siit 2019 i de erwiiterete Gschäftsläitig. De Jan rüttlet, läischtet und kommuniziärt mit em gewoonte Planzer-Fliiss. De familiäär Umgang und Begägnige uf Augehööchi sind sis Ding. Sis Privaatläbe verbringt er am liebschte mit guetem Wii, nette Mänsche und bi de Produkzioon vo Musig.

Karin Purtschert

Gschäftsfüererin Personaalvoorsorgeschtiftig vo de Planzer Transport AG

D‘Karin (1972) isch glernti kaufmännischi Aagschtellti und bildet sich dänn zur Fachfrau für Personaalvoorsorg wiiter. 2012 fangt si bi Planzer aa. Siit 2017 läitet si d’Pensioonskasse. Si schtaat für en moderne und kooperatiive Füerigsschtiil, schänkt Vertroue und überträit Verantwortig. Si schetzt de Fliiss, s’Mitenand und d’Arbetsfröid im Huus Planzer. Iri Stichwort fürs Privaatläbe luuted Familiä, Tschogge und Bergwandere.

Lukas Ricklin

Läiter Immobiiliä Weschtschwiiz

De Lukas (1970) schlüüsst 1998 sis Architektuurschtudium ab und isch dänn als Architäkt und Projäktläiter im In- und Ussland täätig. Siit 2009 läitet er gmeinsam mit em Philipp Bättig d’Immobiiliäabtäilig vo Planzer und schtaat de Weschtschwiiz voor. 2015 wird er Mitgliid vo de erwiiterete Gschäftsläitig. Er schetzt de familiäär Umgang, s’Aapackertum und d’Entschäidigsfröid bi Planzer. I sinere Freiziit isch er gern am Räise und verbringt Ziit mit Familie und Fründe.

Das isch öise Verwaltigsraat Planzer Holding

Nils Planzer

Verwaltigsraatspräsidänt

Severin Baer

Verwaltigsraat

Nicolas Baer

Verwaltigsraat

Pascale Planzer

Verwaltigsrätin

D‘Pascale (1969) macht d Matuur und bsuecht di Hööcher Pädagoogisch Leeraaschtalt. 2002 holt ihre Vatter Bruno sii in Verwaltigsraat, wo si de Blick vonere Usseschteehende und wiiblichi Intuizioon iibringt. Zurziit macht si en CAS für Verwaltigsrööt. D Pascale suecht i irne Mitmänsche s’Guete, setzt uf de Momänt und verlaat au gern emal iri Komfortzoone. Iri Seel laat si i de Natuur bambele, zum Bischpiil am Berg oder uf em Golfplatz.

Alessandro Celli

Verwaltigsraat

De Alessandro (1962) studiärt Juura und wird Partner bi Beiker McKänsii. Siit 2011 sitzt er im Verwaltigsraat vo Planzer. Da konzentriärt er sich uf rächtlichi Sache, Kompläiens und Risikobeurtäilige. Zu sine Chernwert ghööred Liideschaft, Muet, Optimismus, Äigeschtändigkäit und Vertroue. Sini Batterie ladt de Alessandro bim Velofaare, Pilaates, Läse und mit Architektuur uuf.

Thomas Nieszner

Verwaltigsraat

De Thomas (1956) macht e kaufmännischi Leer und holt sich a de Colambia Juniwörsiti Niuu Jork en MBA. 2015 wird er Verwaltigsraatsmitgliid vo Planzer. Als Vollbluetschpeditöör verantwortet er da ales, was mit em nazionaale und internazionaale Logischtikbisness z’tue hät. De Thomas bevoorzugt Mänsche, wo eerlich, reschpäktvoll und tolerant sind. Sini freie Stunde widmet er de Schii- und Langlaufpischte, em Wandere und sine Änkelchind.

Linus Sulzer

Verwaltigsraat

De Linus (1963) lärnt Hochbouzäichner und schlüüsst dänn es Architektuurschtudium ab. 2009 tritt er em Verwaltigsraat vo Planzer bii. Da isch er zueschtändig für sämtlichi Boutheeme. De Linus schätzt bsunders Mänsche, wo mit offne Charte spiled. Er glaubt a Taatchraft, Äigeverantwortig und a d’Gsetz vom Handle. I sinere Freiziit isch er uf em Griin oder uf Räise.

Gerard van Kesteren

Verwaltigsraat

De Gerard (1949) stuidiärt Betriibsönonomii und wird Wirtschaftsprüefer. Er bekläidet diversi VR-Mandaat und gründet d’van Kesteren Faundeischen. 2015 chunt er in Verwaltigsraat vo Planzer. Da verantwortet er ales rund um d’Strategii und d’Finanze. Zfridehäit und Woolschtand z’täile hät für de Gerard Prioritäät. Sini freie Stunde widmet er de Natuur und sinere Stiftig.

Das isch öise Verwaltigsraat Planzer Transport

Nils Planzer

Verwaltigsraatspräsidänt

Severin Baer

Verwaltigsraat

Nicolas Baer

Verwaltigsraat

Hans-Peter Bänziger

Verwaltigsraat

De Hans-Peter (1949) schlüüst e KV-Leer ab, dänn di Höcheri Wirtschafts- und Verwaltigsschuel. Bald schtiig er bi Planzer ii. 32 Jaar lang läitet er Planzer Gänf, wiiteri 7 Jaar d’Ritschard-Gruppe.
Im VR vo de Planzer Transport AG git er siit 2013 de Weschtschwiiz e Schtimm. De Hans-Peter setzt uf verantwortlichi, zueverläässigi, unkomplizierti und uusglichni Mänsche. Sin äigene Uusgliich fint er bim Wandere, Golfe und Schiifaare.

Roland Eberle

Verwaltigsraat

De Roland (1953) studiärt Agraarökonomii a de ETH. Nach 10 Jaar a de Spitze vom Tuurgauer Buureverband und 12 Jaar als Tuurgauer Regierigsraat wächslet er i d’Privaatwirtschaft.
Siit 2017 sitzt er im VR vo de Planzer Transport AG. Für de Roland staat de Mänsch im Zäntrum vo jedem undernähmerische Würke. Drum isch er bim Familiäbetriib Planzer genau richtig. D’Batteriie lat er uf sinere BMW R1200C, mit de Familiä und mit Fründe uuf.

Peter Schütz

Verwaltigsraat

De Peter (1959) isch glärtne Elektromontöör, studiärte Betriibswirt und Entreprenöör. De Inhaber vo de Letrona AG sitzt i diverse Verwaltigsrööt, siit 2016 bi de Planzer Transport AG. Undernähmergäischt isch für de Peter gliichziitig e Fähigkeit und e Dänkhaltig. So bewiist er au bim Treilrunning, Schiifaare, Langlaufe und Wandere ziilschtrebigi Usduur. Under em Motto «guete Wii mues sii» pflägt de beräisti Wiiconessöör Fründschafte und Beziäige.

Jean-Jacques Miauton

Verwaltigsraat

De Jean-Jacques (1951) spezialisiärt sich nach de kaufmännische Uusbildig auf Staalwerch in Itaalie. 1974 gründet er d’Miauton-Gruppe und läitet bis 2008 iri operatiive Gschäft, gliichziitig die vo de CRH Gétaz Holding. Er isch ehemalige Vorsitzende vom Biiraat Waadt-Wallis vo de Schwiizerische Nazionaalbank.  De Jean-Jacques wächslet is Verwaltigsraatspräsidium vo de Miauton-Holding AG in La Chaux-de-Fonds. I di strateegischi Füerung vo de Planzer Transport AG chunt er 2013. Liideschaft und Entschlossehäit definiert de  Jean-Jacques als zentraali Erfolgsfaktoore.

Roland Jäggi

Verwaltigsraat

De Roland (1959) lernt Baanbetriibsdischponänt und bildet sich zum diplomiärte Verchaufskoordinaator wiiter. Siit über 30 Jaar isch er bei Planzer täätig, under anderem als Läiter Transport Nazionaal und Gschäftsfüerer vo de Gebr. Kuoni Transport AG. Bi dere sitzt er siit 2020 im Verwaltigsraat. De Roland setzt uf Eerlichkäit, Aaschtand und Reschpäkt. Di freie Stunde verbringt er mit seine Änkelchind, uf em Bäik, em Golfplatz oder de Schiipischte.

Stephan Imboden

Verwaltigsraat

De Stephan (1956) studiärt Volkswirtschaft und Rächt. Aaschlüüsend praktiziert er als Aawalt, vor allem im Wirtschaftsrächt. Hüt angaschiert er sich i Verwaltungsrööt vo Undernäme us de Bau-, Banke- und Immobiiliebransche.  De Stephan schetzt Mänsche, wo Probleem diräkt und ufrichtig aagönd, Lösösige suched und s’Glaas halb voll gseend. Sini Freiziit widmet er de Gschicht, de Kunscht, em Räise (vor allem Itaalie), em Wandere und Golfe.

Mir frööged, Nils Planzer antwortet

Du staasch mit dim Name für es Schwiizer Familiäundernäme inere bewegende Bransche. Was isch dir da bsunders wichtig?

Sit min Grossvatter Max Planzer öises Familiäundernäme gründet hät, liit öis äi Äigeschaft bsunders am Herze: Fliiss. Ich persönlich möcht, dass mer de nächschte Generazioon e gsundi und erfolgriichi Baasis übergänd. Dadezue bruuchts nüd nur wirtschaftliche Erfolg, sondern e intakti und gläbti Undernämeskultuur. Das isch öis enorm wichtig.

Naachhaltigkäit isch es Schlüsseltheema bi Planzer. Was verschtaasch du drunder? Und werum isch das Theema zentraal?

Naachhaltigkäit ghöört zur DNA vomene gsunde Familiäundernäme. Das liit i de Natuur vo de Sach, dänn Familiäundernäme dänked i Generazioone. Das langfrischtige Dänke underscheidet sich vo de churzfrischtige Gwünnmaximierig bi börsekotierte Undernäme. Wichtig sind Taate, nüd Wort.

Wo staat Planzer i 30 Jaar?

Ich wünsch mir, dass mir öis wirtschaftlich und kulturell wiiterhin positiv entwickled und öisi Wert biibhalted. Und dass au di nächschti und übernächschti Generazioon mit Erfolg, Fliiss und Fröid a der Arbet für Planzer tätig isch und d’Bedürfnis vo de Chunde im Mittelpunkt stönd. Uf dem Wäg werdemer öis nachhaltig us de Schwiiz use i ali Himmelsrichtige entwickle – mit globale Schnittschtelle un enere regionaale Verankerig. De Mänsch isch dadebii immer im Mittelpunkt.

Das chönt Si äno interessiäre

+41 (0) 44 / 744 64 64 Zum Kontaktformulaar Zum Chundeportaal Standort Tschöpps Onlineshop